منتديات البرنس المصرى

اهلا بك زائرنا الكريم
منتديات البرنس المصرى ترحب بكم ويشرفها ان تنضم الى اسرة المنتدى
منتديات البرنس المصرى

egyption prince

منتديات البرنس المصرى ترحب بالاعضاء الجدد وتتمنى لكم قضاء وقت ممتع

    لو قابلت الريس هتقوله إيه ؟

    شاطر
    avatar
    MoMo
    مشرف منتدى الكمبيوتر
    مشرف منتدى الكمبيوتر

    عدد المساهمات : 42
    تاريخ التسجيل : 06/09/2010

    لو قابلت الريس هتقوله إيه ؟

    مُساهمة من طرف MoMo في السبت سبتمبر 11, 2010 4:22 am

    بعد إذن حبيب ومستشاريه وكل رجالة البوليس..

    إنتا فين ؟؟ وبتعمل ايه ؟؟ .. ووراك ياريس غيرنا إيه ؟؟..

    مش انتا برضو اللى فإيديك كل الموارد والقرار ؟؟ ..

    مش انتا طرت فيوم ياريس ورجعت شايل الانتصار ؟؟ ..

    ومدام قبلت فيوم ياريس تضحياتنا ..

    من حقنا تسمع وتعرف ايه مكفر سيئاتنا ..

    وانا مش هقول لا قانون طوارىء ولا ظرف طارىء..

    ولا سياسه ولا انتخابات الرياسه..

    ولا شقه الإسكان باعوها .. لكام مهندس فى الاساس هم اللى خدوا قرض
    وبنوها ..

    ولا هبكى يا ريس عشان أصعب عليك ..

    شاهد يا ريس ربنا .. صفّوا دموعى قبل ماجى والتقيك ..

    دول فهّمونا ان انتا ياريس عايزنا نكون عبيد ..

    ومفهمينك ان شعبك تحت رايتك عاش سعيد ..

    إزاى عبيد ؟؟ واحنا اللى كنا مغطيينك وانتا طاير عالقنال..

    وازاى سعيد ؟؟ وكل واحد فينا همه يلاقى لقمة للعيال..

    كلنا عاتبين ياريس .. وتاعبنا كبت وفقر حال ..

    إسمع يا ريس مننا .. ماتشوفش أحوالنا فتقرير أو مقال ..

    ليه فى مابينّا ألف حيطه .. هو انتا سر ؟؟

    لو كنت مش عارف ماتسمع .. وان كنت خايف مننا .. ليه مستمر ؟؟

    عمر ماقدر احتلال يخفى جوانا العزيمة ..

    كان بيخرج فوق دماغه ضرب بالجزمة القديمة ..

    وبايديك انتا فيوم أكتوبرى خدنا الزمام ..

    وقولنا يللا يا مصر بينا للأمام ..

    هاااااااااااااا ؟؟

    ايه حصل وخنق فى أجوافنا الكلام ؟؟

    كان نصر بس ؟؟ مافيش أثر عالناس يبان ؟؟

    من طينه احنا مخلوقين .. ومن دهب خلق اليابان ؟؟

    معلش يا ريس اذا صوتى على .. ماهى اصلها حاجة تجيب يأس وجنان..

    صدقنى فيه ناس فى الشوارع ماشيه تحت متنبله ..

    عكسوا المثل .. بقوا يقولوا لكل حل مشكله ..

    دنا شوفت واحد ماشى فى الزحمة وراسه مدلدله ..

    ولما قولت الدنيا زحمة بص قدامك ضحك ..

    وقال خلاص طريقى عارفه .. والحكومة مطمنانى مجرجرانى بسلسله ..

    إلحق يا ريس مصر عماله تعجّز .. والعَجَز مالى القلوب ..

    والله ماتعبنا التعب ده فى الحروب ..

    خلاص يا ريس كل حاجة حلوة باقيه بتتخرب ..

    وازاى هنرفع راسنا برا ؟؟

    واحنا من سلطات بلدنا فوق قفانا بننضرب ؟؟

    وان كنت يا ريس عايزنى ماروحش وانضم لكفايه ..

    حسسنى مرة انك معايا ..

    الناس ياريس اللى ثارت فى البلد دى معاها حق ..

    متهانين .. متعذبين .. والجريمة ؟؟ قالوا لأ ..

    يعنى إيه لما يحصل كل دا فمصر النهارده ؟؟

    يعنى ايه يبقى القانون فيه غرامة للمعارضة ؟؟

    يعنى ايه صاحبى يقوللى اوعى تطلق لحيتك ؟؟

    واما تطول نص سنتى أمن دولة فشقتك ؟؟

    يعنى ايه لما كل الشعب يغرق نفسنه ؟؟

    يعنى ايه لما الوزير يفضل وزير عشرين سنه ؟؟

    يعنى ايه ان العلام مجانى وادفع للدروس ؟؟

    يعنى ايه مصالحى تمشى فكل حته بالفلوس ؟؟

    يعنى ايه وانا فى المطار يفتشونى ذاتى ساعه ؟؟

    واشوف بعينى الأجنبى داخل معاه شنطة بضاعه ؟؟

    يعنى ايه لما تغلى كل حاجة وتقولولى الدنيا عيد ؟؟

    يعنى ايه لما وسط الناس تموّت مخبرين خالد سعيد ؟؟

    يعنى ايه ان الجنيه يبقى أقرب للبريزة ؟؟

    يعنى ايه للفلوس تتزلزل النفس العزيزة ؟؟

    يعنى ايه نص الشباب مالجواز فاقدة الأمل ؟؟

    يعنى إيه يبقى عمره اربعين من غير عمل ؟؟

    تعرف انتا يعنى ايه ؟؟ .. يعنى سر واوعى تسأل اللى من حواليك عليه ..

    هيقولولك كلها اربع سنين .. وكل شىء هيكون تمام ..

    واحنا حبة رغايين مش بنزهق مالكلام ..

    قولت أقولك .. واحتمال حالى يدلك..

    ان اكتوبر يا ريس صار عتيق .. وانتصارة فينا ضاق ضل الطريق..

    وكل مادا الانتصار عمال يضيق ..

    والشعب تحت الارض خايف يتسجن .. والتهمه انه عاش برىء ..

    واسأل الأطفال يا ريس ..

    تعرفوا عن نصر اكتوبر وعن حلمه الجرىء ؟؟

    هيقولولك كوبرى عالى ..

    أو دا اسم محافظة فيها ابنى بيتك عالطريق ..




    ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
    avatar
    SHADOW
    مشرف المنتدى الترفيهى
    مشرف المنتدى الترفيهى

    عدد المساهمات : 601
    تاريخ التسجيل : 05/09/2010
    العمر : 25

    رد: لو قابلت الريس هتقوله إيه ؟

    مُساهمة من طرف SHADOW في الأحد سبتمبر 12, 2010 10:02 pm

    ده منتدى ترفيهى وليس سياسى وشكرا


    ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

    miro

    عدد المساهمات : 91
    تاريخ التسجيل : 09/09/2010

    رد: لو قابلت الريس هتقوله إيه ؟

    مُساهمة من طرف miro في الخميس سبتمبر 16, 2010 10:40 am

    خلاص انقل الموضوع يا SHADOW
    avatar
    ساندرا

    عدد المساهمات : 41
    تاريخ التسجيل : 16/09/2010

    رد: لو قابلت الريس هتقوله إيه ؟

    مُساهمة من طرف ساندرا في الخميس سبتمبر 16, 2010 11:07 am

    انا لو قابلته مش هكلمه لانى مخاصمه و زعلان منه عشان حال البلد و لازم يصالحنى مش انا زى بنته برضه
    avatar
    tiger

    عدد المساهمات : 29
    تاريخ التسجيل : 16/09/2010
    العمر : 30

    رد: لو قابلت الريس هتقوله إيه ؟

    مُساهمة من طرف tiger في الجمعة سبتمبر 17, 2010 9:37 pm

    و انا عبيط عشان اقابله انا لو قابلته هضرب بالنار

      الوقت/التاريخ الآن هو الثلاثاء نوفمبر 21, 2017 12:37 am